ကရင်စစ်ပြေးဒုက္ခသည်များ နေရာချရန် ကေအင်န်ယူစီစဉ်

04 May 2013   ကရင်စစ်ပြေးဒုက္ခသည်များ နေရာချရန် ကေအင်န်ယူစီစဉ်ရန်ကုန်- ကေအင်န်ယူ ထိန်းချုပ် နယ်မြေ ထားဝယ်၊ မြိတ်ခရိုင် အတွင်းရှိ နယ်မြေ အချို့တွင် စစ်ပြေး ကရင်ဒုက္ခသည်များ နေရာချ ထားပေးရန် အတွက် နယ်မြေများ သတ်မှတ် တိုင်းတာမှု ပြုလုပ်နေပြီ ဖြစ်ကြောင်း ထားဝယ်၊ မြိတ်ခရိုင် ကရင် အမျိုးသား အစည်းအရုံး ဗဟို အလုပ် အမှုဆောင် ဦးစောဟူရယ်က ပြောသည်။
ပလော မြို့နယ်ရှိ စန္ဒီပလောနှင့် မေတ္တာမြို့ နယ်ခွဲရှိ ကျိုက်ထီး တောင်တို့တွင် ရွာအသစ်တည်ရန် သက်ဆိုင်ရာ တိုင်းဒေသကြီး အစိုးရ အဖွဲ့သို့ တင်ပြထားကြောင်း၊ ယင်း နေရာတွင် ပြည်တွင်းရှိ စစ်ပြေး ဒုက္ခသည် အိမ်ထောင်စု ၃၅ စုကျော်ကို နေရာချထားရန် ပြင်ဆင် နေကြောင်း ၎င်းက ပြောသည်။
တောတောင် များတွင် နေထိုင်သော ပြည်တွင်းရှိ ကရင်ဒုက္ခသည် များကို ပထမအဆင့် စာရင်းကောက် ယူပြီး ဒုတိယအဆင့် နေရာချထား ပေးခြင်းနှင့် ဘ၀ထူထောင် ပေးခြင်းများကို ခြောက်လကြာ လုပ်ဆောင် ပေးသွားမည် ဖြစ်ကြောင်း ၎င်းက ဆက်လက် ပြောကြားသည်။ “တောမှာ နေမလား၊ ပြောင်း ပေးတဲ့ နေရာနေမလား။ ဘယ်မှာ ဆိုတာကို ခြောက်လလောက် စာရင်း ကောက်မယ်။ အခုတော့ ပညာပေး အဆင့် လုပ်ပြီး သွားပါပြီ”ဟု ၎င်းက ဆိုသည်။
ကရင် အမျိုးသား အစည်းအရုံး ထိန်းချုပ် နယ်မြေ ဖြစ်သော ထားဝယ်၊ မြိတ်ခရိုင် တပ်မ ၄ ရှိရာနယ်မြေ ထားဝယ်-ကန်ချနပူရီထိုင်း ကားလမ်းရှိ မြေနေရာ များတွင်လည်း နေရာချထား ပေးရန် အစီအစဉ် ရှိကြောင်း တောတောင် များတွင် ပြန့်ကျဲနေသော ပြည်တွင်းနေ ကရင် ဒုက္ခသည် များကို ဦးစွာ နေရာချထား ပေးပြီး ပြည်ပရှိ ကရင် ဒုက္ခသည်များ နေရာချပေးရေး စီစဉ်ရှိကြောင်း ဦးစောဟူရယ်က ပြောသည်။
ထိုင်းနိုင်ငံရှိ ကရင်ဒုက္ခသည်များနှင့် ပတ်သက်ပြီး ထိုင်းအခြေစိုက် ကရင်ဒုက္ခသည် ကော်မတီကို ကရင်ပြည်နယ် အစိုးရအဖွဲ့နှင့် နယ်စပ် လုံခြုံရေး ဗိုလ်မှူးအောင်လွင် အဖွဲ့တို့က ကရင်ပြည်နယ် ဘားအံ မြို့တွင် ဧပြီ ၂၅ ရက်က တွေ့ဆုံခဲ့ပြီး ယင်းတွေ့ဆုံမှုတွင် ကရင်ဒုက္ခသည် အိမ်ခြေ ၅၀ ကို အစမ်းနေထိုင်ရန် ဖိတ်ခေါ်သည့် ကရင်ဒုက္ခသည် ကော်မတီက သတင်း ထုတ်ပြန်သည်။
ထားဝယ် ရေနက် ဆိပ်ကမ်းနှင့် ကန်ချနပူရီ နယ်စပ်လမ်း တစ်လျှောက်ရှိ ထီးခီး၊ အမ်ရိုင်း၊ ဆင်ဖြူဒိုင်၊ ကသလာထီး၊ အမိုကျေးရွာ မယ်ဇလီထီး အပါအ၀င်ကျေးရွာ ၂၀၀ ကျော်သည် ၁၉၇၅ -၁၉၉၇ ခုနှစ်အ ထိ အစိုးရနှင့် ကရင် အမျိုးသား အစည်းအရုံးတို့ ဖြစ်ပွားသော နှစ်ဖက် စစ်ပွဲများကြောင့် ရွာလုံးကျွတ် ပျက်စီး ဆုံးရှုံးခဲ့သော ကရင်တပ်မ ၄ ၏ မြေနေရာများ ဖြစ်သည်ဟု ကေအင်န်ယူ အဖွဲ့က ဆိုသည်။

0 comments:

Post a Comment