အာရှတွင် အွန်လိုင်းတက္ကသိုလ်များ ထွန်းကားနေ

Written by အယ်ဒီတာ

အွန်လိုင်းတက္ကသိုလ်များနှင့် အွန်လိုင်း ပညာရေးစနစ်သည် အာရှတွင် အလျှင်မြန်ဆုံး ဖွံ့ဖြိုးတိုးတက်လာပြီး၊ နည်းပညာနှင့် အင်တာနက်ကို လူသားတို့ အလွန်အမင်း အားထားလာခြင်း၊ နိုင်ငံအများစုကလည်း ပြည်သူများကို အင်တာနက်မြန်နှုန်းမြင့်များ ရရှိစေရန် ကြံဆောင်ပေးနိုင်ခြင်း တို့ကြောင့် အွန်လိုင်းပညာရေးသည် ဖွံ့ဖြိုးတိုးတက်လာရခြင်းဖြစ်ကြောင်း သိရသည်။
တက္ကသိုလ်ကောလိပ်များသို့ သွား ရောက်တက်ပြီး ဘွဲ့ယူခြင်းများတွင် စရိတ် ကြီးမြင့်လာမှုများကြောင့် စာသင်သားဦးရေ ကျဆင်းလာသည့် ပြဿနာကို ကမ္ဘာ့နာမည်ကျော် တက္ကသိုလ်ကောလိပ်ကြီးများကလည်း အွန်လိုင်းသင်ကြားရေး၊ အွန်လိုင်းဘွဲ့ ပေးရေးစနစ်များဖြင့် ပြန်လည်အရှိန်ယူလာကြသည်။
မလေးရှားအစိုးရသည် ယမန်နှစ်က နိုင်ငံအတွင်း အွန်လိုင်းမှ သင်ကြားနေသူ ပေါင်း ၈၅၀၀၀ ရှိကြောင်း ထုတ်ပြန် ကြေညာခဲ့သည်။ အစဉ်အလာနေ့တက် ကျောင်းများတွင်လည်း အွန်လိုင်းအခြေခံ သင်ကြားရေးစနစ်များကို တွဲဖက်လုပ် ဆောင်နေပြီဟုဆိုသည်။
တောင်ကိုရီးယားနိုင်ငံတွင် တက္ကသိုလ် ကောလိပ်ပေါင်း ၁၉ ခု၌ ၂၀၀၂ ခုနှစ်မှ စတင်ကာ အွန်လိုင်းပညာရေးကို ဆောင် ရွက်နေပြီး၊ လက်ရှိ အွန်လိုင်းတွင် ပညာ သင်ကြားနေသူပေါင်း ၁၁၂၀၀၀ ရှိကြောင်း သိရသည်။
တရုတ်ပြည်တွင် ၁၉၉၀ ပြည့်နှစ်ခန့် ကတည်းက အွန်လိုင်းပညာရေးကို စတင် ဆောင်ရွက်နေပြီး အထူးသဖြင့် ကျေးလက် နေပြည်သူတို့အတွက် စီစဉ်ဆောင်ရွက်ပေး ထားခြင်းဖြစ်သည်။ ၂၀၁၀ ပြည့်နှစ်အထိ တရုတ်ပြည် အွန်လိုင်းပညာရေးအတွက် စာရင်းသွင်းထားသူပေါင်း ၁ ဒသမ ၆၄ သန်းရှိသည်။
လက်ရှိအနေအထားတွင် အွန်လိုင်း ပညာရေး၌ တောင်ကိုရီးယားသည် ၈၀ ရာခိုင်နှုန်း၊ မလေးရှားသည် ၆၀ ရာခိုင်နှုန်း၊ တရုတ်သည် ၄၀ ရာခိုင်နှုန်းနှင့် အိန္ဒိယတွင် ၁၀ ရာခိုင်နှုန်းသင်ကြားနေကြကြောင်း သိရသည်။

0 comments:

Post a Comment