ကရင်နီ ရိုးရာ ဒီးကူပွဲတော်

Wednesday, 26 September 2012 16:12

အဲဒီပုံသဏ္ဍာန်နဲ့ စုချည်ထားတဲ့ ကောက်ညှင်းထုပ်ကို ကရင်နီလို  “ ဒီးကူ”  လို့ခေါ်ကြပါတယ်။
ဒီးကူထုပ်ကို ကရင်နီတွေ ကအမျိုးသားရဲ့ သင်္ကေတ အနေဖြင့် အထွဋ်အထိပ် ထားကြပါတယ်။
သူ့ကျွန်ဘဝမှ လွတ်မြောက်တဲ့ အထိမ်းအမှတ်ကို အစွဲပြုပြီး ဒီးကူပွဲကို အထွဋ်အထိပ်ထားရခြင်း ဖြစ်ပါတယ်။
 

၂၀၁၂ ခုနှစ် ကရင်နီဒုက္ခသည်စခန်း၌ ဒီးကူပွဲတော် ကျင်းပစဉ် (ဓါတ်ပုံ-ကေတီ)
ဒါကြောင့် ကရင်နီလူမျိုးတွေက ရောက်ရာ အရပ်ဒေသမှာ တစ်နှစ်တစ်ခါ ကျင်းပပြုလုပ်လေ့ ရှိကြပါတယ်။ ယခု ၂၀၁၂ ခုနှစ်  စက်တင်ဘာလ အတွင်း ထိုင်းနိုင်ငံ မယ့်ဟောင်ဆောင်ခရိုင်ထဲက ကရင်နီအမှတ် ၁ ဒုက္ခသည် စခန်းမှာ စုပေါင်းဒီးကူပွဲတော်တရပ် ပြုပ်လုပ်ခဲ့ ကြပါတယ်။ အမျိုးသားတွေ အမြတ်တနိုးထားတဲ့ ဒီးကူပွဲကို တနှစ်တခါ ကျင်းပပြုလုပ်ရတဲ့ အကြောင်းရင်းနဲ့ ပတ်သက်ပြီး အဖိုး လော်ရယ် ကနေပြီး အခုလို ပြောပါတယ်။
“ကျနော်တို့ဒီးကူပွဲဟာ ယွန်းလူမျိုးတွေကို စစ်နိုင်ခဲ့ကြတဲ့ မှတ်တမ်း အဖြစ် နတ်တွေ၊ ၀ိညာဉ်တွေကို အစာကျွေးတာပါ။ သေဆုံးသွားတဲ့သူတွေအတွက် ပွဲလုပ်ပေးတာပါ။ ဟိုး.... ယွန်းလူမျိုးတွေကို တိုက်တုန်းက ဆိုရင် တိုက်ပွဲမှာ တိုင်းပြည်အတွက် အသေခံသွားတဲ့ သူတွေ အများကြီးရှိပါတယ်။” လို့ ပြောပါတယ်။
ဘီစီ ၇၃၉ နှောင်းပိုင်းလောက်မှာ မွန်ဂိုးလီးယားကနေ ယခုလက်ရှိ ဒွေးမယ်နော် (ငွေတောင်ပြည်) ခေါ် ကရင်နီပြည်မှာ နေထိုင်ခဲ့ ကြစဉ်က ယွန်းလူမျိုးတို့ရဲ့ ကျူးကျော်ဝင်ရောက် အုပ်ချုပ်မှုကို ခံခဲ့ကြရပြီး နှစ်ပေါင်း ၁၀၀ တိုင် ကျွန်အဖြစ်ဖိနှိပ်ခံခဲ့ရတဲ့ ဘဝကနေ လွှတ်မြောက်လာတဲ့ ပွဲတော်ဖြစ်ပါတယ်။
ကရင်နီတွေ သူ့ကျွန်ဘဝမှ လွတ်မြောက်ဖို့ ယွန်းတွေကို တွန်းလှန် တိုက်ခိုက်ခဲ့စဉ်က တာရှည် အထားခံတဲ့ ဒီးကူထုပ်ကို စစ်ပွဲအတွင်း အသုံးပြုခဲ့လို့ ရိက္ခာ ပြတ်တောက်မှု၊ အစာငတ်မှု စတဲ့ ရိက္ခာပြဿနာ မရှိပဲ စစ်ပွဲကို အနိုင်ရခဲ့တယ်လို့ ဆိုပါတယ်။
ယွန်းလူမျိုးကနေ လွှတ်မြောက်လာတဲ့ အထိမ်းအမှတ်ပွဲတော် ဒီးကူပွဲတော်ဟာလည်း ရိုးရာဓလေ့ထုံးစံအရ အဆင့်ဆင့် သတ်မှတ်လုပ်ဆောင်ရတာတွေ  ရှိပါတယ်။
ပထမ အဆင့်အနေနဲ့ ပွဲတော်ကျင်းပနိုင်ဖို့ ရက်ရာဇာ သတ်မှတ်တာတွေ ကြက်ရိုးထိုးပြီး နတ်ပူဇော် မေးမြန်းတာတွေကို ပြုလုပ်ကြပါတယ်။

ကရင်နီရိုးရာ ဒီးကူနှင့် ခေါင်ရည်
ပွဲတော်အတွက် ကြက်ရိုးထိုး နတ်ပူဇော်မေးမြန်းထားတဲ့ အဖိုး ခူးငါးရယ်က “ဒီမနက်လို ကြက်ရိုးထိုးတာက ပွဲတော်အတွက် ဘယ်ရက်ကကောင်းလဲ ၊ ဘယ်ရက်က အဆင်ပြေလဲ ဆိုပြီးတော့ ကြက်ရိုးထိုးတာဖြစ်တယ်။” လို့ပြောပါတယ်။ ကြက်ရိုးထိုးမေးမြန်းထားချက် အရ ပွဲတော်ကို စက်တင်ဘာလ ၁၈ ရက်နေ့မှာ ပြုလုပ် ကြပါတယ်။ အဲဒီနေ့ဟာလည်း ဒီးကူထုပ်တဲ့ ဒီးကူးရွက်ခူးခြင်းနဲ့ ဒီးကူထုပ်ရန် အတွက် အသင့်တော်ဆုံး နေ့တနေ့ အဖြစ်လို့လည်း သတ်မှတ်ကြပါတယ်။
နောက်တနေ့မှာတော့ ထုပ်ထားတဲ့ ဒီးကူ တွေကို ပြုတ်ခြင်းနဲ့ ကြိုတင် ချက်လုပ်ထားတဲ့ ရိုးရာ ခေါင်ရည်တွေကို ဖောက်ထုတ်ခြင်းတွေ ပြုလုပ်ရပါတော့တယ်။
ကြက်ရိုးထိုးပြီး သုံးရက်မြောက်နေ့မှာတော့ အခမ်းအနားနဲ့တကွ ဧည့်သည်တော် တွေ နဲ့ သူငယ်ချင်းရောင်းရင်း တို့ကိုဧည့်ခံကျွေးမွေး ကြရပါတော့တယ်။
အခမ်းအနားမှာတော့ ဒီးကူပွဲဖြစ်ပေါ်လာပုံ အကြောင်းရဲ့ သမိုင်းနဲ့ ပတ်သက်ပြီးတော့ ကျောင်းဆရာမ တစ်ဦးဖြစ်တဲ့ မော်ဗျားမာက ရှင်းပြပါတယ်။
မော်ဗျားမာက “ရှေးလူကြီး တွေပြောတာက ငါတို့ ဒီးကူ စည်းလို၊ ဒီးကူ ထုပ်တထုပ်လို  တစုတစည်းထဲ ဖြစ်ရမယ်။ ပေါင်းပေါင်းစည်းစည်း ညီညီညွတ်ညွတ်နေရမယ်။ ဘာဖြစ်လို့လဲဆိုရင်တော့ ဟိုးအရင် ယွန်လူမျိုးတွေကို တိုက်ထုတ်တုန်းက ကယား၊ ကယန်း၊ ကယော စတဲ့ လူမျိုးစုတွေ အတူတကွ စုပေါင်းတိုက်ထုတ်ခဲ့တဲ့အတွက် ညီအစ်ကိုလိုပဲသဘောထားတယ်။" လို့ ပြောပါတယ်။
ဆက်လက်ပြီး ကရင်နီစာပေနှင့် သာသနာရေးရာ ဒု-ဝန်ကြီး ဦးစိုးရယ်ကလည်း "အခုချိန်က ကျနော်တို့ သူများနိုင်ငံ တွင်းမှာ သွားရောက်နေထိုင်နေကြတာဖြစ်တယ်။ ကျနော်တို့ ဟာ ထိုင်းအင်္ကျီတွေ ဗမာအင်္ကျီ တွေဝတ်ဆင်ထားကြတယ်။ အဲတော့ ကျနော်တို့ ဟာ အတုအယောင်တွေလိုဖြစ်လာတယ်။" လို့ ပြောပါတယ်။
ဒီးကူပွဲတော်ရဲ့ နောက်ဆုံးတခုကတော့ ဖိုးဒီးကရီး ခေါ် နတ်ရုပ် ပြုလုပ်ခြင်း၊ မေးမြန်းခြင်းနဲ့ ပွဲတော် အပြီး နတ်ပို့ ခြင်းတို့ပဲ ဖြစ်ပါတယ်။
အဲဒီမှာပဲ ဒုက္ခသည်အဖြင့် နေထိုင်လာကြရတဲ့ ဘဝကနေပြီး မကြာခင်မှာ လွှတ်မြောက်တော့မယ်လို့ ဖိုးဒီးကရီးကို အဓိဌာန်ပြုမေးမြန်းထားကြတဲ့သူတွေက ဟောကိန်းထုတ်ထားကြ ပါတယ်။
အဓိဌာန်ပြုမေးမြန်းထားချက်အရ ဖိုးဒီးကရီးမှ ပြသတဲ့ လက္ခဏာအရ ခူးဦးရယ်က  “ကိုယ့်ရပ်ကိုယ့်ရွာမှာ ကိုယ်ပိုင်အိမ်ယာတွေနဲ့ပြန်ပြီး လုပ်ကိုင်စားနိုင်ပြီး ကိုယ့်ပြည်ကို ပြန်အုပ်စိုးခွင့် ရပြီး ဘိုးဘွားဘီဘင်ခေတ်ကလို ပြန်ဖြစ်သွားမှာပါ။” လို့ ပြောပါတယ်။

0 comments:

Post a Comment