နိုင်ငံခြားပညာသင်ဆု လျှောက်ချင်သူများအတွက် လမ်းညွှန်ချက်

Thursday, 02 August 2012 11:30
 တင်ညွန့်

ပညာသင်ဆု (Scholarship) မှာ အထူးသဖြင့် နိုင်ငံခြား ပညာသင်ဆုတွေကို မက်မောလိုချင်သူတွေ ရှိပေမယ့် ဘယ်လိုလူမျိုးတွေ ပညာသင်ဆုရတယ်၊ ဘယ်လိုအရည်အချင်းတွေရှိရင် ပညာသင်ဆု ရတယ်ဆိုတာ သိသူ နည်းပါတယ်။ ကိုယ့်ကိုယ်ကို
- နိုင်ငံတကာပညာသင်ဆုကို လျှောက်ဖို့ ငါ့မှာ အမှန်တကယ် အရည်အချင်းတွေရှိရဲ့လား
- ငါ့မှာရှိတဲ့ ပညာလောက်နဲ့ ပညာသင်ဆု လျှောက်ဖို့ လုံလောက်ရဲ့လား
- ပညာသင်ဆုရအောင် ဘာတွေလုပ်ရမယ်ဆိုတာ သိထားပြီးပြီလားလို့ ပြန်ပြီး မေးကြည့်သင့်ပါတယ်။
ပညာသင်ဆုဆိုသည်မှာ
ပညာသင်ဆုဆိုတာ
- တောင်းတိုင်း မပေးဘူး
- ပြောတိုင်းလည်း မရဘူး
- အသနားခံတိုင်းလည်း မရဘူးဆိုတာကိုတော့ ဦးစွာ သိထားစေ ချင်ပါတယ်။ နောက်ပြီး ဆင်းရဲလို့၊ ချို့ငဲ့လို့ ဆိုပြီးတော့လည်း ပေးတာမျိုး မရှိဘူး။ ဖွံ့ဖြိုးဆဲနိုင်ငံကဖြစ်လို့၊ လူနည်းစု မျိုးနွယ်စုက ဖြစ်လို့ဆိုပြီးတော့လည်း မပေးဘူး။ တိတိကျကျ ပြောရရင် ပညာသင်ဆုဆိုတာ ပေးတာမဟုတ်ဘူး။ ရအောင် အားထုတ်ယူ ရတယ် ဆိုတာကို သိထားစေချင်ပါတယ်။
ပညာသင်ဆုဆိုတာ ကိုယ့်အစွမ်းအစကို ဖော်ထုတ်ပြသနိုင်ရတယ်။ ကိုယ့်အရည်အချင်းကို သက်သေပြနိုင်ရတယ်။ ဒီလို လူမျိုးတွေပဲ ပိုင်ဆိုင်ကြတာ များပါတယ်။
ပညာသင်ဆုရဖို့ အရည်အချင်းတွေ
ပညာသင်ဆုရဖို့ မွေးရာပါ အရည်အချင်းဆိုတာ မရှိဘူး။ ပညာသင်ဆုဆိုတာ ငွေကြေးနဲ့ ဘဏ္ဍာရေးအနေ အထားတွေပေါ်မှာ အခြေခံရတာကြောင့် သိပ်ပြီး ပေါပေါများများ ပေးလေ့မရှိဘူး။ အခြေအနေအရ သတ်မှတ် ချက်တွေ အများကြီး ရှိနိုင်တယ်။ ပေးမယ့်သူက သတ်မှတ်ထားတဲ့ အရည်အချင်းမျိုးတွေ ကိုယ့်မှာရှိရင် ပထမအဆင့် အောင်မြင်တယ်လို့ဆိုရမယ်။
ပညာသင်ဆုပေးသူတွေ ကြိုက်တဲ့ အရည်အချင်းမျိုးတွေဆိုတာ ဘာတွေလဲ
ပညာသင်ဆုအတွက် အနိမ့်ဆုံးအရည် အချင်းများ
- ပညာသင်ဆုပေးသူတွေက သတ်မှတ်ထားတဲ့ နိုင်ငံတွေရဲ့ နိုင်ငံသားတွေဖြစ်ဖို့လိုတယ်
- သတ်မှတ်ထားတဲ့ အသက်အရွယ်ကို ပြည့်မီသူတွေ ဖြစ်ရမယ်။ သတ်မှတ်ချက်ဆိုတာ ပညာသင်ဆု တစ်ခုနဲ့တစ်ခု မတူညီနိုင်ဘူး။ အသက်အရွယ် အပိုင်းအခြား ကန့်သတ်မှု မရှိတဲ့ ပညာသင်ဆုတွေလည်း ရှိတတ်တယ်
- အနည်းဆုံးတော့ အထက်တန်း အောင်မြင်ပြီးကြောင်း အထောက်အထား လက်မှတ်တော့လိုတယ်။ ဒါမှ တက္ကသိုလ်ပညာ ဆက်တက်လို့ရမှာပေါ့။ ဘွဲ့လွန် မာစတာတန်းတွေ ဆက်တက်ဖို့ဆိုရင် ဘွဲ့တစ်ခုခုတော့ရပြီး ဖြစ်ရလိမ့်မယ်။ ဒေါက်တာ (သို့မဟုတ်) ပါရဂူဘွဲ့အတွက်ဆိုရင်တော့ မာစတာတန်း ဘွဲ့တစ်ခုခု ရပြီးသား ဖြစ်နေဖို့ လိုအပ်ပါတယ်။
- သတ်မှတ်ထားတဲ့ ပညာအရည်အချင်း ပြည့်မီရမယ်။ သူတို့ပေးတဲ့ ပရိုဂရမ်နဲ့ ကိုက်ညီတဲ့ ပညာရပ်ဆိုင်ရာ လေ့လာ သင်ယူခဲ့မှုမျိုး ရှိဖို့လည်းလိုတယ်
- အင်္ဂလိပ်ဘာသာစကားကို ကျွမ်းကျင်ကြောင်း အထောက်အထား တစ်ခုခုတော့ ပြဖို့လိုမယ်။ ဒါကြောင့် TOEFL သို့မဟုတ် IELTS သတ်မှတ်ချက် ရမှတ်ကို ကိုင်ဆောင်ထားရလိမ့်မယ်။ အဲဒီစာမေးပွဲတွေကို ဖြေဆိုပြီး သတ်မှတ်ထားတဲ့ ရမှတ်နဲ့ ကိုက်ညီဖို့လိုတယ်။ အချို့သော ပညာသင်ဆုတွေမှာ ရရှိထားတဲ့ ဘွဲ့ကိုပဲ အခြေခံ ထားတာကြောင့် အင်္ဂလိပ်စာကို တတ်ပြီးသားလို့ ယူဆထားတဲ့အတွက် ကန့်သတ်ချက်တွေ ပါချင်မှ ပါလိမ့် မယ်။ ဒါပေမယ့် နိုင်ငံခြားကို ပညာ သွားသင်ရမှာဖြစ်လို့ အနည်းဆုံး အင်္ဂလိပ်လို ကျွမ်းကျင်ထားရင် ပိုကောင်းပါတယ်။
ပညာသင်ဆု အမျိုးအစားများ
- Entrance Scholarship
အထက်တန်းအဆင့်ကို ထူးချွန်စွာ အောင်မြင်ထားကြောင်း အထောက်အထားများ ပြသနိုင်ရသည်။ အထူးသဖြင့် ရမှတ်များသည် ၉ဝ ရာခိုင်နှုန်းနှင့်အထက် ဖြစ်နေရမည်။
- Excellence Scholarship
Grade Point Average (GPA) ကို တင်ပြနိုင်ရမည်။ အထူးသဖြင့် 3.0 နှင့်အထက် ဖြစ်နေရမည်။ 4.0 လောက်ကိုသာ စဉ်းစားပေးလေ့ရှိသည်။
- Leadership Scholarship
ကိုယ်တိုင်က လုပ်ငန်းခွင်ကို ဦးဆောင်ဦးရွက်ပြုနေသူ၊ ခေါင်းဆောင်နိုင်စွမ်းရှိသူ၊ အတွေ့အကြုံများကို တင်ပြနိုင်သူ ဖြစ်ရပါလိမ့်မည်။
- Competition Scholarship
အပြိုင်အဆိုင် ယှဉ်ပြီး ဖြေဆိုနိုင်ရမည်ဖြစ်သည်။ ဥပမာ စာစီစာကုံးကို ရေးသားပြီး တင်သွင်း ဖော်ထုတ်ပြခြင်း မျိုးဖြစ်သည်။
- Development Scholarship
ပညာသင်ပြီးလျှင် ကိုယ့်တိုင်းပြည်ပြန်ရသည့် ပညာသင်ဆုမျိုးဖြစ်သည်။
- Youth Scholarship
ငယ်ရွယ်သူဖြစ်ရမည်။ အနည်းဆုံး အသက် ၂၅ နှစ်အောက်ကို ဆိုလိုပါသည်။
ဘယ်လို အရည်အချင်းမျိုးတွေ ရှိရမလဲ
သတ်မှတ်ထားတဲ့ အရည်အချင်းတွေ ပြည့်မီရုံနဲ့ ပညာသင်ဆုရမယ်လို့ မပြောနိုင်သေးဘူး။ အရည်အချင်း ကောင်းတွေရှိပေမယ့် ကံဆိုတာကိုလည်း ထည့်ပြောရဦးမယ် ထင်ပါတယ်။ ပညာသင်ဆု တစ်ဆုတည်း အတွက် လျှောက်ထားမယ့်သူပေါင်း များစွာ ရှိနိုင်တယ်။ အဲဒီလူတွေကလည်း သူတို့မှာ ကိုယ်စီ အရည်အချင်း တွေရှိလို့ပေါ့။ ပညာသင်ဆုကို ပေးသူတွေကလည်း လျှောက်သလောက်ကို မပေးနိုင်တော့ ဆန်ခါတင် စစ်ဆေးပြီး ရွေးချယ်ရတာတွေ ရှိလာပါလိမ့်မယ်။ ရွေးချယ်သူတွေက ဘယ်လိုအနေ အထားတွေနဲ့ ပြန်လည် သုံးသပ်တတ်သလဲ ဆိုတာကို ပြန်ကြည့်ရင်
- လျှောက်ထားသူတွေဟာ သူတို့လေ့လာမှု၊ ကျွမ်းကျင်မှု၊ ဖော်ဆောင်ပြနိုင်မှုနယ်ပယ်တွေမှာ ဘယ်လောက် အတိုင်းအတာအထိ စွမ်းဆောင်ထားနိုင်သလဲ။ သူတို့ရဲ့ ရေရှည်သင်ယူနိုင်စွမ်း၊ အလုပ်အကိုင်အခွင့်အလမ်း မျှော်မှန်းချက်၊ ပညာသင်ဆုလျှောက်ထားရတဲ့ ရည်ရွယ်ချက်
- ပညာသင်ဆုလျှောက်ထားသူရဲ့ ရမှတ်တွေ၊ စစ်ဆေးချက် ရလဒ်တွေ၊ ဘွဲ့၊ လက်မှတ်၊ ထောက်ခံချက်တွေ
- ပညာသင်ဆုလျှောက်ထားသူ ကိုယ်တိုင်ရေးသား တင်သွင်းလာတဲ့ သဘောထား၊ ခံယူချက် (စာစီစာကုံး အနေဖြင့် သို့မဟုတ် စာတစ်စောင် အနေဖြင့် ရေးခိုင်းတတ်တယ်)
- လျှောက်ထားသူတင်ပြလာတဲ့ လျှောက်လွှာပါ အကြောင်းအချက်များ (ပြည့်စုံမှု၊ တိကျမှု၊ ရှေ့နောက် ညီညွတ်မှု)
- ဖွံ့ဖြိုးတိုးတက်ရေးကို ဦးတည်ပြီးခေါ်တဲ့ ပညာသင်ဆုတွေမှာ ကိုယ့်နိုင်ငံ ကိုယ့်လူမျိုး တိုးတက်ရေးအတွက် ဘာတွေ ပြန်လုပ်ပေးမယ်ဆိုတဲ့ သဘောထား
- သုတေသနကျောင်းသားတွေအတွက် သူတို့ရထားတဲ့ဘွဲ့ ပညာနဲ့ ပေးတဲ့ပညာသင်ဆု ကိုက်ညီမှုရှိမရှိ
အထက်မှာ ဖော်ပြခဲ့တဲ့အချက်တွေကို ပညာသင်ဆုရွေးချယ်ရေးအဖွဲ့တွေက ပြန်ပြီး သုံးသပ်စစ်ဆေး ကြရတယ်။ အဲဒီအချက်တွေဟာ ပြိုင်ဘက်တွေထက် ကိုယ့်အပေါ်ကို ရွေးချယ်ရေးအဖွဲ့တွေက မျက်နှာသာပေး နိုင်မယ့်အချက်တွေ၊ ကံကောင်းစေမယ့် အချက်တွေလို့လည်း ယူဆနိုင်ပါတယ်။
ဥပမာ ကိုယ့်မှာ အမှတ်ကောင်းကောင်း၊ ရလဒ် ကောင်းကောင်းတွေ မရှိပေမယ့် ကိုယ့်အကြောင်းကို ဖော်ကျူး ရေးခိုင်းတဲ့ စာမျိုး၊ စာစီစာကုံးမျိုးတွေကို ကြိုက်ပြီးတော့ ဆုရွေးချယ် ပေးလိုက်တာတွေလည်း ရှိတတ်တယ်။ တစ်ခါတစ်လေ ကိုယ်လုပ်နေတဲ့ အလုပ်၊ သုတေသနလုပ်ငန်းနဲ့ သူတို့လိုချင်တဲ့ သုတေသနအမျိုးအစား သွားပြီး ကိုက်ညီနေရင်လည်း ပညာသင်ဆု ရသွားတတ်တာ မျိုးတွေရှိတယ်။ ဒါကြောင့် ကိုယ်ယခင်က ဘာတွေ လုပ်ဖူးတယ်၊ ဘယ်လိုနယ်ပယ်မှာ ကျင်လည်ခဲ့တယ်၊ ဘယ်လိုသုတေသန စာတမ်းတွေ ပြုစု ရေးသား ခဲ့တယ်ဆိုတာတွေဟာ ကိုယ့်ကို အများကြီးပြန်ပြီး အထောက်အကူပြုနိုင်တယ်။
စမ်းသပ်ကြည့်ခြင်း
ကိုယ့်ကိုယ်ကို ပညာသင်ဆု ရနိုင် မရနိုင်ဆိုတာ ဒီလိုပြန်ပြီး စစ်ဆေးကြည့်နိုင်ပါတယ်။
- အထက်မှာဖော်ပြခဲ့တဲ့ အချက်တွေနဲ့ ကိုယ့်မှာ ကိုက်ညီမှုရှိရဲ့လား၊ ရှိတယ်ဆိုရင် ပညာသင်ဆုလျှောက်ဖို့ ပြင်ဆင်ပေတော့။ မရှိတာတွေများနေရင် ရှိနိုင်အောင် ထပ်ကြိုးစာဖို့လိုပြီ။ ဒါပေမယ့် ပညာသင်ဆု တစ်ခုနဲ့ တစ်ခုဟာ မတူညီတာကြောင့် ပုံသေမှတ်ထား လို့လည်း မရသေးဘူး။ ဘာပြောပြော ကိုယ်ပိုင်အရည်အချင်း ဆိုတာတော့ရှိသင့်ပါတယ်။ ရှိသင့် ရှိထိုက်တာတွေ ရှိအောင်လုပ်၊ ရသင့်ရထိုက် တာတွေ ရအောင်လုပ်ထား၊ ပညာသင်ဆု လိုချင်ရင် အစစအရာရာ မျက်ခြေမပြတ်အောင် စုံစမ်းလေ့လာ လိုက်နေမယ်ဆိုရင် တစ်ကွေ့တော့ တစ်ခုခုနဲ့ တွေ့မှာ သေချာပါတယ်။
တင်ညွန့်

0 comments:

Post a Comment