အစိုးရအာဏာပိုင်များ မြစ်ကြီးနားလုံခြုံရေး တင်းကြပ်

11 May 2012
KNG


ကချင်ပြည်နယ် မြစ်ကြီးနားမြို့ပေါ်ရှိ ရပ်ကွက်တိုင်းတွင် မေလမှစပြီး လုံခြုံရေး တင်းကြပ်လာပြီဟု မြစ်ကြီးနား ဒေသခံများပြောသည်။

ကချင်ပြည်နယ်မြို့တော်တွင် မကြာခဏ ဗုံးပေါက်ကွဲမှုများ ဖြစ်ပေါ်လာခြင်းကြောင့် အစိုးရက ပိုမိုလုံခြုံရေး တင်းကြပ်လာသည့်အနေဖြင့် ရပ်ကွက်တိုင်းတွင် အလည့်ကျ ည ကင်းစောင့်ခိုင်းသည်ဟု ဒူကထောင် ရပ်ကွက်မှ ဒေသခံတစ်ဦးကပြောသည်။

ယခု လဆန်းမှစပြီး ရပ်ကွက်တိုင်းတွင် တစ်အိမ် တစ်ယောက်ဖြင့် ညတိုင်း လူ ၅ ယောက်စီ အလည့်ကျ စောင့်ရကြောင်းနှင့် အကယ်၍ တစ်အိမ်မှ တစ်ယောက်မသွားပါက အရေးယူခံရမည်ဖြစ်ကြောင်း ၎င်းဒေသခံက ပြောသည်။


မြစ်ကြီးနားမြို့ပေါ်ရှိ ဂိတ်များနှင့် ရပ်ကွက်အ၀င်အထွက်ပေါက်များတွင်လည်း ညနေ ၇ နာရီ နောက်ပိုင်း ဆယ်ကယ်ဖြင့်သွားလာသူများကို ညကင်းများ၊ မီးတပ်နှင့် ရဲများမှ မော်တော်ဆိုင်ကယ် ထိုင်ခုံအဖုံးများဖွင့်ခိုင်းပြီး စစ်ဆေးမေးမြန်းမှုများ ပြုလုပ်နေကြောင်း သီတာရပ်ကွက်မှ ဒေသခံတစ်ဦးက ပြောသည်။

ပြီးခဲ့သည့်ပတ် မေ ၅ ရက်နေ့ ညတွင်လည်း အမြောက်ကားကြီး ၂ စီးဖြင့် အစိုးရစစ်သားများနှင့် ရဲများက မြစ်ကြီးနားမြို့တွင်း လည့်ပတ်သွားလာသည်ကို မြင်ရသည်ဟု စီတာပူရပ်ကွက် ဒေသခံတစ်ဦးကပြောသည်။

“ရှေ့မှာတော့ ရဲကားတစ်စီးအရင်သွားတယ်။ အဲဒီနောက်မှာ အမြောက်ကား ၂ စီး၊ အဲဒီနောက်မှာတော့ ဆိုင်ကယ်နဲ့ စစ်သားတွေသွားတယ်။ စစ်သားတွေရဲ့နောက်မှာတော့ ရဲကားတစ်စီးပြန်သွားတယ်။ အဲဒီလို လမ်းမကြီးအတိုင်း လည့်ပတ်ကြတာဟုတ်တယ်။” ဟု ၎င်းကပြောသည်။

သင်္ကြန်ကာလမှစပြီး ကချင်ပြည်နယ်မြို့တော်တွင် မကြာခဏ ဗုံးပေါက်ကွဲမှုများ ဖြစ်ပေါ်လာခြင်းဖြစ်သည်။

ထိုသို့ပေါက်ကွဲမှုများဖြစ်ပေါ်တိုင်း နိုင်ငံပိုင်အစိုးရသတင်းစာများတွင် ကချင်လွတ်မြောက်ရေးတပ်ဖွဲ့(KIA) ကိုစွပ်စွဲထားသော်လည်း KIA က မြန်မာအစိုးရ စစ်ရေးပစ်မှတ်များမှတပါး လက်နက်မဲ့ပြည်သူများကို တိုက်ခိုက်ခြင်းမရှိကြောင်း ငြင်းဆိုသည်။

0 comments:

Post a Comment