ဂျော်ဂျီယာနိုင်ငံ၏ ကွန်ပျူတာပညာရေး

Wednesday, 29 February 2012 04:52
တင်ညွန့်

ကမ္ဘာ့ဘဏ် (World Bank) လို အဖွဲ့အစည်းကြီးကနေ ပညာရေးစိတ်ဝင်စားတဲ့တိုင်းပြည်တွေမှာ လိုက်လံ အကောင်အထည်ဖော်ပေးနေတဲ့ ပရောဂျက်တွေကို လူသိနည်းပါတယ်။
နိုင်ငံငယ်လေးတွေဖြစ်တဲ့ ဥပမာ− ဥရုဂွေး နဲ့ ပေါ်တူဂီနိုင်ငံတွေမှာ ပညာတော်လှန်ရေးအတွက် နည်းပညာလက်နက်တွေကို တပ်ဆင်ပေးနေတာ ကမ္ဘာ့ဘဏ်ရဲ့ ဦးဆောင်ကြိုးပမ်းချက်တွေဖြစ်ပါတယ်။ ကမ္ဘာ့အခြားအစိတ်အပိုင်းတွေဖြစ်တဲ့ အရှေ့ ဥရောပနဲ့ အာရှအလယ်ပိုင်းတွေမှာပါ ပညာရေးပြုပြင်ပြောင်းလဲမှုတွေ လုပ်မှဖြစ်တော့မယ်ဆိုတာ ပညာလှိုင်းတွေ ရိုက်ခတ်ချက်ကြောင့်ဖြစ်လာရတာပါ။
ကမ္ဘာ့ဘဏ်ကနေ အကောင်အထည်ဖော်နေတဲ့ ပညာရေးမှာနည်းပညာကို အသုံးချရေးပရောဂျက်ကြီးတစ်ခု ရှိပါတယ်။ အဲဒီပရောဂျက်ကို Russia E-Learning Support Project လို့ခေါ်ပါတယ်။ မက်ဆီဒိုး နီးယားနိုင်ငံကလည်း ပထမဦးဆုံး “ကြိုးမဲ့တိုင်းပြည်” (Wireless Country) ဖြစ်အောင်လုပ်ခဲ့တယ်။ ဘော်လ်ကန်မှာလည်း မူလတန်းနဲ့ အလယ်တန်းကျောင်းတွေမှာ အွန်လိုင်းနဲ့သင်ကြားနေတာ ၅ နှစ် လောက် တောင်ရှိနေပြီ။ အက်စ်တိုးနီးယားနဲ့ ပစိဖိတ်ကျွန်းစုထဲက Nius လိုကျွန်းနိုင်ငံလေးတွေမှာတောင် ပညာရေးကို နည်းပညာနဲ့ ပြုပြင်ပြောင်းလဲဖို့ ကြိုးပမ်းနေကြတာတွေ့ရတယ်။
အရှေ့ဥရောပနဲ့ အနောက်အာရှရဲ့ လမ်းဆုံမှာရှိနေတဲ့ ဂျော်ဂျီယာလို နိုင်ငံသေးသေးလေးမှာ laptop ကွန် ပျူတာလေးတွေကို မူလတန်းကျောင်းတွေမှာ ခွဲဝေပေးထားတယ်။ မူလတန်းကျောင်းတွေရဲ့ တတ်မြောက်မှု စစ်ဆေးခြင်း (စာမေးပွဲ) ကို အွန်လိုင်းကနေ ကွန်ပျူတာနဲ့ပဲစစ်ဆေးမှုတွေ လုပ်နေတော့ ကျောင်းသားတွေ မူလတန်းကစပြီး ကွန်ပျူတာတွေကို မဖြစ်မနေ ကိုင်ကို ကိုင်လာရတော့တယ်။
ဂျော်ဂျီယာမှာ ကွန်ပျူတာပညာရေးကို အကောင်အထည်ဖော်ဖို့ ရှေ့ပြေးအစီအစဉ်အနေနဲ့ Netbook အလုံး ၂၅၀၀ ကို ပထမတန်းကျောင်းသားတွေနဲ့ ဆရာတွေအတွက် ၂၀၁၀ ခုနှစ်ကစပြီး ခွဲဝေပေးပါတယ်။ ခုဆိုရင် “Buki” လို့ခေါ်တဲ့ ကွန်ပျူတာအလုံးပေါင်း ၆၀၀၀၀ ကို အစိုးရအနေနဲ့ ဖြန့်ဝေပေးနိုင်ခဲ့ပြီဖြစ်တယ်။
ဘူကီ netbook တွေဟာ Intel ထုတ် Classmate ဆိုတဲ့ laptop တွေကို ဂျော်ဂျီယာမှာ ရှိတဲ့ ဒေသခံ ကွန်ပျူတာ ကုမ္ပဏီတစ်ခုကနေ ပြန်လည်ပြုပြင်ထုတ်လုပ်ထားတာဖြစ်တယ်။ ဒစ်ဂျစ်တယ်ဖတ်စာအုပ်တွေနဲ့ ပညာရေးဆိုင်ရာ အခြားဆော့ဖ်ဝဲတွေကို ကွန်ပျူတာထဲမှာ ထည့်ပေးထားတယ်။ Art ဆိုတဲ့ ဂိမ်းအပါအဝင် ပညာရေးဝန်ကြီးဌာနကစီစဉ်ထားတဲ့ အခြားပညာရေးဆိုင်ရာ ဂိမ်းပေါင်း ၅၀ လောက်ကို လည်းထည့်သွင်းပေး ထားတယ်။
အစိုးရအနေနဲ့ စာရွက်ပေါ်မှာဖြေနေရတဲ့ စာမေးပွဲနေရာမှာ စာရွက်မဲ့ အွန်လိုင်း test ကို အစားထိုးဖို့ ကြိုးပမ်းချက်တစ်ခု ဖြစ်ပါတယ်။ ဥရောပနဲ့ တောင်အမေရိကနိုင်ငံတွေမှာ ပညာရေးအတွက် laptop ထုတ်လုပ်မှုတွေကို လူသိများပါတယ်။ ပေါ်တူဂီနဲ့ ဗင်နီဇွဲလား၊ ဂျော်ဂျီယာနဲ့ ဆူရီနာမီနိုင်ငံတွေကြားမှာ ပညာရေးအတွက် link တွေလုပ်နေကြတာကိုတော့ လူသိနည်းပါတယ်။
ဂျော်ဂျီယာမှာ ဘူကီ laptop တွေကို မူလတန်းအဆင့်လောက်ကတည်း သုံးကြတယ်။ အဲဒီမျိုးဆက်ကို ဘူကီမျိုးဆက်လို့ သတ်မှတ်ကြတယ်။ အလယ်တန်းအဆင့်ပြီးရင် program တွေရေးနိုင်အောင် မူလတန်း မှာကတည်းက အခြေခံတစ်ခု ချပေးလိုက်တာပါ။
မနှစ်က ဂျော်ဂျီယာမှာ တစ်နိုင်ငံလုံး စာမေးပွဲစနစ်ပြုပြင်ပြောင်းလဲမှုတွေ ပထမဦးဆုံးစလုပ်တယ်။ တက္ကသိုလ် အဆင့်အထိ စာမေးပွဲစနစ်တွေမှာ မသမာမှုတွေပပျောက်ရေးကို ဦးတည်တာလို့လည်းဆိုတယ်။ ကျောင်းထွက် လက်မှတ်ရစာမေးပွဲတိုင်းကို ကွန်ပျူတာစနစ်နဲ့ စစ်ဆေးမယ်ဆိုတာ အခြားနိုင်ငံတွေအတွက်လည်း စိန်ခေါ်ချက် တစ်ခုဖြစ်စေတယ်။ ကွန်ပျူတာကို အခြေခံသောစစ်ဆေးမှုဆိုတာ မဖြစ်မနေလိုက်လုပ်ရတော့မယ့် စစ်ဆေး နည်းဆိုတာကို လမ်းဖွင့်ပေးလိုက်သလိုလည်း ဖြစ်သွားတယ်။
ဂျော်ဂျီယာအစိုးရအနေနဲ့ စာမေးပွဲကို စာရွက်နဲ့စစ်ဆေးတဲ့စရိတ်တွေအားလုံးကို ဖြတ်ချလိုက်တယ်။ ကျောင်း တွေမှာ စာမေးပွဲကို ကွန်ပျူတာနဲ့ပဲစစ်ဆေးရမယ်လို့ ပြဋ္ဌာန်းလိုက်တယ်။ စာမေးပွဲကို အွန်လိုင်းမှာပဲ ဖြေဆိုခွင့်ရှိ တယ်ဆိုတော့ ကျောင်းတွေမှာ အိုင်စီတီနဲ့ပတ်သက်တဲ့ အခြေခံအဆောက်အအုံတွေကို မဖြစ်မနေ တည်ဆောက်လာကြရတော့တယ်။
ကျောင်းပေါင်း ၁၅၀၀ ကျော်က ကျောင်းသားပေါင်း ၄၄၀၀၀ ဟာ ကျောင်းသင်ခန်းစာတွေကို ကျယ်ပြန့်စွာ လေ့လာရတယ်။ စာမေးပွဲကြီးကြပ်သူတွေရွေးရတယ်။ ကျောင်းစစ်စာမေးပွဲကို တစ်ရက် တစ်ဘာသာ ၈ ရက် ဖြေရတယ်။ စာမေးပွဲဖြေပြီးတာနဲ့ ချက်ချင်းအောင်/ရှုံးသိအောင် ထုတ်ပြန်ပေးတယ်။ အချိန်နဲ့တပြေးညီ ဖြေဆိုမှုတွေကို အကဲဖြတ်လေ့လာသူတွေကလည်း လေ့လာနေကြတယ်။
ကျောင်းတွေက သတ်မှတ်ထားတဲ့ ကွန်ပျူတာတွေမှာ စာဖြေမယ့်ကျောင်းသားတွေက နေရာယူရတယ်။ နိုင်ငံအဆင့် သတ်မှတ်ပေးထားတဲ့ ခုံနံပါတ်တွေကို ကွန်ပျူတာထဲမှာ logged in လုပ်ပြီး စာရင်းသွင်းရတယ်။ စာမေးပွဲကြီးကြပ်သူက သက်ဆိုင်ရာ အွန်လိုင်းစာမေးပွဲအတွက် code ကို လာပြောလိမ့်မယ်။ ရိုက်သွင်းပြီးရင် ကျောင်းသားက ကွန်ပျူတာပေါ်မှာ ဖြေဆိုနိုင်ပြီ။
ဆလိုဗေးနီးယားပညာရေးဝန်ကြီးဌာန တာဝန်ရှိသူတစ်ဦးက ဒီပြုပြင်ပြောင်းလဲမှုဟာ ပညာရေးစနစ်ရဲ့ မဟာပေါက်ကွဲမှုကြီး “Big Bang” လို့တင်စားပါတယ်။ ပညာရေးမှာ ရင်းနှီးမြှပ်နှံမှုကို အစပိုင်းမှာ ကြီးမားစွာ လုပ်ဆောင်လိုက်ရပေမယ့် နောက်ပိုင်းရရှိလာတဲ့ အကျိုးဆက်ကတော့ ပိုပြီးမြန်ကောင်းသက်သာ စေလာနိုင်ကြောင်း ဝန်ကြီးကပြောပါတယ်။
ဂျော်ဂျီယာမှာ ဘူကီမျိုးဆက်ကို ထူထောင်လိုက်ရတာ ပြုပြင် ပြောင်းလဲမှုတွေအားလုံးကို တပ်လှန့်နှိုးလိုက်သလိုဖြစ်သွားတယ်။ နည်းပညာဝန်းကျင်တစ်ခုကို တစ်ခု တည်း ပြုပြင်ပြောင်းလဲလို့ရတာမဟုတ်တော့ ရေမြင့်ကြာမြင့် လိုက်ပြောင်းရတာတွေ အများကြီးဖြစ်လာလိမ့်မယ်။
ပြုပြင်ပြောင်းလဲမှုတစ်ခုကို တွန်းလို့ရရင်ရ၊ မရရင် ဆွဲတင်ရပါတယ်။ လူထုအားနဲ့မရရင် အစိုးရအားကို ယူရ တယ်။ အစိုးရက ပေါ်လစီကိုချပြီး ဥပဒေတွေထုတ်ပြန်သင့်တာ ထုတ်ပြန်ပေးရတယ်။ အမြော်အမြင်ကြီးတဲ့ အစိုးရမျိုးနဲ့ ပြည်သူ အားကိုးလောက်တဲ့ အစိုးရမျိုးတွေမှာ စီမံချက်တစ်ခုဟာ ရာနှုန်းပြည့်အောင်မြင်တတ်တယ်။
ကျောင်းတွေမှာ စာမေးပွဲကို စာရွက်နဲ့ဖြေလို့မရတော့ဘူးလို့ အမိန့်ထုတ်လိုက်ချိန်မှာ ကျောင်းသားတွေရော မိဘတွေပါ ပြူးပြာသွားကြတယ်။ အတွေ့အကြုံမရှိကြပေမယ့် ဖြစ်အောင်လိုက်လုပ်ကြတယ်။ တစ်ပတ် လောက်ကြိုပြီး ကွန်ပျူတာတွေနဲ့ အလုပ်တွေရှုပ်ကုန်ကြတယ်။
ကွန်ပျူတာနဲ့ အစမ်းဖြေဆိုတာတွေ လုပ်ကြ တယ်။ မေလမှာ တစ်နိုင်ငံလုံးအတွက် အွန်လိုင်းစာမေးပွဲကိုစစ်ဆေးဖို့ ကြေညာထားတယ်။ မသမာမှုကင်း သော၊ လက်တွေ့ဆန်သော၊ ရလဒ်ကိုချက်ချင်းသိနိုင်သော၊ နိုင်ငံတကာအဆင့်မီသော ပညာရေးတစ်ခုဖြစ် အောင် ဂျော်ဂျီယာနိုင်ငံက ကြံဆောင်နေပါတယ်။ ဘယ်လောက်အတိုင်းအတာအထိ အောင်မြင်တယ်ဆိုတာ စောင့်ကြည့်ရပါလိမ့်မယ်။
ဘာပြောပြော ပညာရေးပြုပြင်ပြောင်းလဲမှုကို လုပ်ကိုလုပ်ကိုလုပ်ရမယ်ဆိုတဲ့ အသိတရားတွေနဲ့ တကယ်ဖြစ်ချင်လို့ တကယ်လုပ်နေကြတာကိုတော့ ချီးကျူးရပါလိမ့်မယ်။

0 comments:

Post a Comment