သြစတြေးလျနိုင်ငံ ပညာရေးပြုပြင်ပြောင်းလဲမှု အစီအစဉ်

Monday, 16 January 2012 09:40
တင်ညွန့်

ကျောင်းတွေကို အရည်အချင်းပြည့်ကျောင်းတွေဖြစ်အောင် သြစတြေးလျနိုင်ငံမှာ အမျိုးသားရေးအသွင်နဲ့ လုပ်ဆောင်နေပုံကို ပြောချင်ပါတယ်။
သြစတြေးလျအစိုးရက နိုင်ငံတော်အဆင့်၊ ဒေသဆိုင်ရာအဆင့်၊ ပညာရေးကို အထောက်အပံ့ပေးနေတဲ့ အစိုးရမဟုတ်တဲ့ NGO အဖွဲ့အစည်းတွေနဲ့ ပညာရေးကို အရည်အသွေး ပြည့်မီအောင် ပူးပေါင်း အလုပ်လုပ်တယ်။ တစ်ဦးနဲ့တစ်ဦး၊ တစ်ဖွဲ့နဲ့တစ်ဖွဲ့ အပေးအယူ အထောက်အကူဖြစ်နိုင် အောင် စီစဉ်ပေးတယ်။
အစိုးရက ပညာရေးကို ဦးဆောင်တယ်ဆိုတာ လက်ဝါးကြီးအုပ်ထားတာမျိုး မဟုတ်ဘူး။ လုပ်သင့်လုပ်ထိုက်တဲ့ အလုပ်တစ်ခုကို အောင်မြင်စေရေးအတွက် အထောက်အပံ့တွေ အကောင်းဆုံးပေးနိုင်အောင် ဦးဆောင်ဦးရွက် ပြုပေးနေတဲ့ သဘောပဲ။
အစိုးရအနေနဲ့ ပညာရေးမှာ ကလေးတစ်ယောက်မှ မကျန်စေခဲ့ရပါလို့ ကတိတွေပေးထားတယ်။ ဒီလေသံကတော့ အမေရိကန်တွေရဲ့ လေသံနဲ့ သွားတူနေတယ်။ ဒါပေမယ့် ထူးခြားတာက ကလေးတစ်ယောက်ရဲ့ လိုအပ်ချက်ကို အလေးပေးထားတာပဲ။ သူတို့ ဘယ်လိုကျောင်းမျိုးကို တက်ချင်နေတာလဲ၊ ဘယ်လိုနေရာမှာ နေချင်တာလဲ၊ ဘယ်ဘာသာရပ်ကို သင်ချင်တာလဲဆိုတာကို အလေးပေးထားတာကတော့ ထူးခြားတယ်လို့ဆိုရမယ်။
ပညာတော်လှန်ရေးကို နိုင်ငံတိုင်းမှာ မဖြစ်မနေလုပ်ရမယ့်အချိန်ရောက်နေပြီ။ အစိုးရကျောင်းတွေမှာရော ပုဂ္ဂလိကကျောင်းတွေမှာပါ တော်လှန်ရေးတစ်ခုကို လုပ်ကိုလုပ်ရတော့မယ်။ ကျောင်းပြုပြင်ပြောင်းလဲရေး၊ ဆရာ ပြုပြင်ပြောင်းလဲရေး၊ ပညာတော်လှန်ရေးအတွက် ကျောင်းတွေကို အခြေခံအဆောက်အအုံကနေ အမြစ်လှန် သင့် လှန်ပစ်ရမယ်။ ပြုပြင်ပြောင်းလဲသင့်တာတွေ ပြုပြင်ရတော့မယ်။
ဒီလိုပြုပြင်ဖို့ ကုန်သင့်ကုန်ထိုက်တာတွေအတွက် သုံးသင့်တဲ့ငွေပမာဏကို သုံးရလိမ့်မယ်။ ငွေအများဆုံးရှာနိုင်၊ ချပေးနိုင်တာ အစိုးရဖြစ်နေလို့ ပညာရေးမှာ အစိုးရရဲ့ ပါဝင်ပတ်သက်မှုကိုလည်း အလေးထားရမယ်။
သြစတြေးလျအစိုးရက ၂၀၀၉-၂၀၁၂ ပညာရေးအတွက် အသုံးစရိတ်ကို ဒေါ်လာ ၆၄.၉ ဘီလီယံလို့ သတ်မှတ် ထားပါတယ်။ ၂၀၀၉ မတိုင်မီက ဒေါ်လာ ၃၃.၅ ဘီလီယံ သုံးစွဲခဲ့တာကြောင့် ထက်ဝက်လောက်ကို တိုးမြှင့်သုံး နေတာပါ။ ယခင်လေးနှစ်ကာလထက် ၈၇ ရာခိုင်နှုန်း တိုးမြှင့်သုံးတယ်လို့ဆိုနိုင်တယ်။
သြစတြေးလျကျောင်းသားတွေအတွက် နိုင်ငံတကာအဆင့်မီအောင် Digital Education Revolution အတွက် ဒေါ်လာ ၂.၂ ဘီလီယံ၊ Trade Training Centres Program အတွက် ဒေါ်လာ ၂.၅ ဘီလီယံ၊ Building the Education Revolution အတွက် ဒေါ်လာ ၁၆.၂ ဘီလီယံဆိုပြီး ခေါင်းစဉ်တွေ ခွဲသုံးပေးတာကလည်း စိတ်ဝင်စားစရာပဲ။
အရည်အသွေးပြည့်ပညာရေးဆိုတာ အခြေခံကောင်းရတယ်။ အခြေခံကောင်းဖို့ဆိုတာ အခြေခံကတည်းက အခြေခိုင်အောင် လုပ်ရပါတယ်။ အခြေခံကောင်းအောင် စာတတ်မြောက်ရေး လုပ်ပေးရတယ်။ အတွက်အချက် တတ်အောင်လုပ်ပေးရတယ်။ အရည်အသွေးပြည့်မီတဲ့ ဆရာတွေနဲ့ သင်ကြားရတယ်။ အားနည်းသူ ကျောင်း သားကို အထောက်အကူပြုနိုင်တဲ့ ပညာရေးမျိုးဖြစ်သင့်တယ်။
နိုင်ငံတကာမှာ အရေး၊ အဖတ်၊ အတွက် အသုံးလုံးဆိုတာထက် အင်္ဂလိပ်စာ၊ အင်တာနက်တွေပါတိုးလာလို့ “အ” ငါးလုံးကို အစိုးရတွေအကောင်အထည် ဖော်လာကြတာကိုလည်း သတိပြုသင့်ပါတယ်။ သြစတြေးလျမှာ Smarter Schools National Pertnerships ဆိုတာ အစိုးရအနေနဲ့ အကောင်အထည်ဖော်ပေးနေတဲ့ အစီအစဉ်လည်းဖြစ်ပါတယ်။
ကျောင်းသား၊ ကျောင်း၊ မိဘ သုံးရပ်စလုံးပူးပေါင်းပြီးတော့ ပညာရေးကို ကောင်းအောင်လုပ်ရတယ်။ ပညာရေး ကောင်း မကောင်း ဒီသုံးရပ်စလုံးနဲ့ ပိုင်းဖြတ်ရတယ်။ သင်ရိုးညွှန်းတမ်းကိုလည်း နိုင်ငံတကာအဆင့်မီအောင် လုပ်ရတယ်။ ပိုထူးခြားတာက အစိုးရအနေနဲ့ နိုင်ငံသားတွေအတွက်ပညာရေးအပြင် နိုင်ငံသားမဟုတ်တဲ့ အခြား နိုင်ငံက ပညာလာသင်သူတွေအတွက်ကိုပါ ထည့်သွင်းစဉ်းစားနေတဲ့အချက်ဖြစ်ပါတယ်။
သြစတြေးလျနိုင်ငံမှာ ပုဂ္ဂလိကကျောင်းတွေကို အလေးထား အားပေးတာများတယ်။ အစဉ်အလာကြီးပြီး ဂုဏ်သိက္ခာကြီးမားတဲ့ ပုဂ္ဂလိကကျောင်းတွေဖြစ်နေလို့ပါ။ အဲဒီကျောင်းတွေမှာ ကျောင်းအဆောက်အအုံရဲ့ ကောင်းခြင်း၊ ကျောင်းတစ်ကျောင်းမှာ ရှိသင့်ရှိထိုက်တဲ့ အားကစားကွင်း၊ စာကြည့်တိုက်၊ ရေကူးကန်စတာတွေ နဲ့ပြည့်စုံခြင်း၊ အရည်အချင်းရှိတဲ့ ဆရာ ဆရာမတွေကိုပဲ လစာကောင်းကောင်းပေးပြီး ခန့်ထားခြင်းတွေကို ပြုလုပ်ကြတယ်။ ဘော်ဒါဆောင်နဲ့ နေထိုင်ရတဲ့ ကျောင်းတွေဆိုရင်လည်း စည်းကမ်းအထူးတင်းကျပ်တယ်။
သြစတြေလျ ပုဂ္ဂလိကကျောင်းတွေဟာ အစိုးရထံကနေ အထောက်အပံ့ယူကြတယ်။ ကျောင်းလခတွေကတော့ အစိုးရကျောင်းတွေထက် ပိုများတယ်။ အားကစားကို အစိုးရကျောင်းတွေထက်ပိုပြီးဦးစားပေးလို့ ကမ္ဘာကျော် အားကစားသမားအများစုဟာ ပုဂ္ဂလိကကျောင်းတွေကထွက်တာများတယ်။ သူတို့နိုင်ငံက Catholic School တွေနဲ့ Independent Schools တွေဟာ ထင်ရှားတယ်။
ဒါကတော့ လတ်တလော သြစတြေးလျနိုင်ငံရဲ့ ပညာရေးလျှပ်တစ်ပြက်ပုံရိပ်တွေဖြစ်ပါတယ်။

0 comments:

Post a Comment