၂၀၁၂ ခုနှစ် စီးပွားရေးတိုးတက်မှု အကောင်းဆုံးနှင့် အဆိုးဆုံး နိုင်ငံများ

 Thursday, 05 January 2012 03:25
ကမ္ဘာ့နိုင်ငံအားလုံးရဲ့ စီးပွားရေးနဲ့ နိုင်ငံရေး အချက်အလက်တွေ အများဆုံး စုဆောင်းထားနိုင်တာကြောင့် ပညာရှင်တွေကြားမှာ ဩဇာကြီးမားတဲ့ Economist Intelligence Unit အဖွဲ့ကြီးက ယခု ၂၀၁၂ ခုနှစ်ရဲ့ ကမ္ဘာ့ စီးပွားရေး အလားအလာတွေကို ခန့်မှန်းလိုက်ပါတယ်။
EIU ရဲ့ ခန်းမှန့်ချက်အရ ပြိုလဲသွားတဲ့ ကဒါဖီအစိုးရလက်အောက်ကနေ ပြန်လည်တည်ဆောက်ယူနေတဲ့ လစ်ဗျားနိုင်ငံ စီးပွားရေးက ၂၀၁၂ ခုနှစ်မှာ ကမ္ဘာ့ တိုးတက်မှုနှုန်း အမြန်ဆုံး ဖြစ်လာမယ်လို့ ဖော်ပြထားပါတယ်။
ဂရိဒဏ္ဍာရီလာ မီးပုံထဲကနေ လူးပျံထွက်တဲ့ ဖီးနစ်ငှက်လို၊ လစ်ဗျားနိုင်ငံကလည်း ၂၀၁၂ မှာ စစ်ပြာပုံကနေ ခုန်ပျံထွက်တော့မယ့် အလားအလာတွေ မြင်နေရတယ်လို့ EIU က ခန့်မှန်းပါတယ်။
စစ်ပွဲလွန် ကသောင်းကနင်း ကသန်းကရမ်းတွေနဲ့ နာလန်ထဖို့ နှေးကွေးခဲ့တဲ့ အီရတ်ကလည်း ၂၀၁၂ မှာ စီးပွားရေး တိုးတက်ဖို့ တာဆူနေပါတယ်။ မိုင်းလုပ်ငန်းကြောင့် ဆန်းပွင့်နေတဲ့ မွန်ဂိုလီးယားနိုင်ငံကလည်း ပြင်ပ ရင်းနှီးမြှုပ်နှံသူတွေ ပြုံတိုးလာနေတာကြောင့် ၂၀၁၂ မှာ အခြေအနေ အကောင်းဆုံးထဲမှာ ရှိနေပါတယ်။
အာဖရိက က အင်ဂိုလာနဲ့ နိုင်ဂျာ နိုင်ငံတို့လည်း ဈေးကွက်စနစ်တွေ ပုံမှန်တိုးတက်လာတာကြောင့် ယခုနှစ်မှာ ဂျီဒီပီ ၁၀ ရာခိုင်နှုန်း ၀န်းကျင်မှာ ရှိကြပါလိမ့်မယ်။ တိုးတက်မှုအကြောင်းပြောရင် စကားထဲ ထည့်စရာမလိုခဲ့တဲ့ ဆူဒန်နိုင်ငံတောင် ရေနံသိုက်တွေကြောင့် ဇူလိုင်လလောက်မှာ ခေါင်းထောင်လာဖို့ ရှိပါတယ်။
တရုတ်ကတော့ အားလုံးသိတော်မူတဲ့အတိုင်း ကမ္ဘာ့ဒုတိယ စီးပွားရေးအင်အားကြီးနိုင်ငံဖြစ်သလို ဒီနှစ်မှာလည်း ပုံမှန် ဆက်တိုးတက်နေဦးမှာမို့ အနောက်နိုင်ငံကြီးတွေ မနာလိုစရာပါလေ။
အခုနှစ်ထဲ စီးပွားရေးနဲ့ ပတ်သက်ရင် အမြဲ စိတ်ပျက်စရာတွေ ဗျစ်တောက်ဗျစ်တောက်တွေ ကြားနေရမှာကတော့ ဥရောပနိုင်ငံတွေပါ။ စီးပွားရေး ကျဆင်းမှု အမြန်ဆုံး အုပ်စုလို့တောင် ဆိုရပါမယ်။
အောက်မှာ ၂၀၁၂ ခုနှစ်အတွက် EIU ရဲ့ ခန့်မှန်းထားတဲ့ ဂျီဒီပီ အတိုးတက်ဆုံးဖြစ်လာမယ့် နိုင်ငံတွေနဲ့ ဂျီဒီပီ ဈန်လျှောမယ့် နိုင်ငံတွေရဲ့ ဇယားလေး ကြည့်လိုက်ပါဦး။
စကားမစပ်၊ နှစ်ပေါင်းရာထောင်ချီ ရန်ဖြစ်နေတဲ့ မြန်မာနိုင်ငံရဲ့ ၂၀၁၂ ခုနှစ် အလားအလာလည်း ကိုယ့်ဖာသာပဲ ခန့်မှန်းကြည့်ကြပါဦး။ အရင်လိုပဲ မိဘအမွေဆိုင် အတွင်းပစ္စည်းတွေ လက်ဦးတဲ့သူက ချရောင်း၊ သွပ်ခွါရောင်း အိမ်တိုင်ချွတ် ရောင်းသလိုမျိုး သဘာဝရင်းမြစ်ကိုပဲ ရောင်းချစားတုန်းပဲလား၊ ဟိုတောင်း ဒီတောင်းပဲလား။ ထုတ်ကုန်ပစ္စည်းနဲ့ ဂျီဒီပီလေး ဘာလေး တက်မယ့် အရိပ်အယောင်များ မြင်ရနိုင်သလား...။

ဝင့်ထန်း
Source: EIU

0 comments:

Post a Comment